Дарога даўжынёю ў 60 гадоў
Гасцінна расчыніла дзверы мінулымі выхаднымі Дзяржаўная ўстанова адукацыі "Лаўрынавіцкая сярэдняя школа Баранавіцкага раёна". Ёй споўнілася 60! Былыя выпускнікі і сучасныя вучні, ветэраны педагагічнай працы і настаўнікі, якія працуюць зараз, шматлікія госці прыйшлі павіншаваць установу адукацыі з цудоўным юбілеем. Для чалавека 60 – гэта мудрасць, вопыт, дасягнутыя вышыні, а для школы 60 – гэта ўзрост малады, вясёлы, поўны надзей.
Для кожнага, хто прыйшоў у школу, сённяшні юбілей стаў старонкай асабістага лёсу. Гартаем школьныя фотаздымкі… З экрана глядзяць тыя, хто стаяў ля вытокаў нашай установы адукацыі. Нізкі паклон Вам, хто ўзначальваў школу ў розныя гады, хто заклаў традыцыі нашай установы адукацыі: Чарноў М. Е., Віткоўскі В. В., Калбаска А. А., Туміла І. П., Калюха М. А., Гурэцкі В. М., Ляўко В. В., Ціхамірава Т. В. І вось на сцэне – сённяшні дырэктар школы – энергічны, ініцыятыўны кіраўнік Храмцова Галіна Аляксандраўна. Яна ўпрыгожыла школу сваёй цеплынёй і абаяльнасцю, яна дастойна прадаўжае справу сваіх папярэднікаў.
Жыццё школы – гэта жыццё яе вучняў. Вельмі прыемна, што ў гэты лістападаўскі дзень былыя вучні знайшлі час і прыйшлі на сустрэчу са сваім дзяцінствам. Успаміны, размовы, цёплыя абдымкі. Шасцідзесяцігадовы юбілей школы сабраў выпускнікоў розных гадоў, бо сустрэцца разам у наш час вельмі складана.
А вось былых настаўнікаў не бывае. На сцэну падняліся ветэраны педагагічнай працы, тыя, для каго школа стала не толькі месцам працы, а самім жыццём, другім родным домам. І хоць змаглі прыйсці не ўсе, але вучні апладысментамі сустракалі Гурэцкую Л. У., Койпаш Г. В., Сянкевіч Г. М., Тукай Г. А., Танюкевіч С. Ч.
Словы падзякі і шчырыя пажаданні прагучалі з вуснаў гасцей нашага свята: Рашэтнік А. Г., метадыста аддзела па адукацыі Баранавіцкага райвыканкама, Артуганавай Н. І., выконваючай абавязкі старшыні Крошынскага сельскага выканаўчага савета, загадчыка Лаўрынавіцкага дома культуры Танюкевіч С. Ч. Установу адукацыі і ўсіх гасцей павіншаваў ансамбль Крошынскага дома культуры “Крушына”.
Адгуляла, адспявала свята. Установе адукацыі пайшоў 61 год. Школа з другой чвэрці зноў прадаўжае рыхтаваць інжынераў, ваенных, будаўнікоў, настаўнікаў і ўрачоў. Хочацца спадзявацца і верыць, што яшчэ шмат гадоў яна будзе стартавай пляцоўкай на жыццёвым шляху для сваіх вучняў.
З юбілеем, школа!
